日本有好多千奇百怪的祭典,其中一個就係參拜男性陽具。唔好以為呢個祭典係18+，我初頭以為都係，但係我去到竟然見到有小朋友。唔通係家長帶佢黎早Ｄ見識見識（嘻嘻嘻）。亦都唔好用有色眼鏡去對待呢個祭典，入面完全除左會展露男女的生殖器官外，係冇其他色情成份，相反仲比較有好多搞笑的小玩意係度添。

根據維基百科的資料顯示，鐵男根祭（日語：かなまら祭）是日本神奈川縣川崎市的傳統祭祀，可追溯至17世紀，祭祀一位名叫「鐵男根」的大神，活動於每年四月的第一個週日舉行，神社會放出不同色彩及大小的陽具，讓人膜拜。當地居民相信靈神可帶來子孫，增強性能力與轉運。

神奈川縣是途徑東京至京都的必經之地。約17世紀時，由於東海道五十三次設有川崎宿，當地色情產業興盛，青樓女子期昐生意興隆，免除性病，期昐金山神社的「鐵男根」祝福。時而勢易，「鐵男根」成為子女、分娩、或走「桃花運」的守護神。祭祀時，遊人會騎在巨型粉紅色木陽具上，攤檔也會出售護身符、祈禱木牌，以至外形如男女性器的糖果，讓人舔啜。

所以呢個祭典其實主要存在係要膜拜大神，我知道你地一定會怕怕醜醜咁唔敢話比人聽你地想黎呢？唔緊要，就由我深入虎穴為大家撳開呢個神秘的面紗（其實唔神秘，而家仲要好多人睇）。順帶一提，鐵男根祭係每年４月的第一個星期日舉行，今年参加唔到就要再等下年了。


日本2019鐵男根祭


鐵男根祭在川崎舉行，由我東京出發黎到川崎，大約需時１個小時１５分鐘。由於上網翻查資料見到祭典係由１０點鐘開始至到４點鐘左右。我仲好懶醒咁以為１０點鐘到就岩岩好啦，咁我就較左８點鐘起身，點知人算不如天算，鬧鐘竟然唔響...原來係較左星期日的鬧鐘係唔響的。好彩我有職業精神，為左比大家睇到好野，我係冇鬧鐘吵醒的情況下，８點２０分就彈左起身。即刻嗱嗱聲梳洗就出發。去到都係１０點１０分了。初時仲諗住好難搵，一早就GOOGLE定睇下要點去，但係發覺做呢樣野都係多餘的。因為去到咁上下附近的轉車站，就已經見到好多外國人去緊同一個地方，只要跟住螞蟻大軍前進，真係連數據流量錢都慳埋一份，可以有多份買手信的錢啦。終於到左川崎，即刻同個車站合照留念一番，唔好以為車站咁少人，因為Ｄ人都衝晒去祭典入面了。





你地睇下人頭湧湧，條隊尾都唔知排到去母雷公的竹林深處入面，由隊尾排到去差唔多入場，足足排左個半鐘。。。。。。都未入到去。係排緊隊的途中，見到好多外國人都帶住條野係度排隊，然後有好多人都影佢地。終於黎到重頭的節目，就係抬大橋出場（第三張相中間粉紅色長形物體），可惜我仲排緊隊入去，無緣去影大大的男根（早知我要７點鐘起身去排啦）唔洗咁心急？睇落去就會見到啦。




見到咁靚的櫻花散落，係相入面睇係完全體會唔到咁靚的仙女散櫻（其實係我唔識影相），係現場睇真係好靚。黎到呢個位，我已經係到左門口了，都一樣係咁多人。






一入到去，除左好似台灣的夜市有咁多野食外（食物唔係我地呢個主題，所以冇影比大家睇），就係好多關於大神的小物品啦，一件大神衫係賣２５００日元，仲有細碼至加大碼，兒童或大人衫任你選擇。同場加映外國人戴住男根啜緊男根的照片一張。







仲有好多男根的小玩意比人地購買，但因為真係太多人的關係，同埋承襲左日本人係收工時間迫上電車的習俗，我就不斷咁比人推向前面，想影好多小玩意相比大家睇下都唔得。



祭典入面仲有其他助慶的表演，例如打鼓同埋有人唱歌等等。







再行入去少少就見到神社，費盡九牛二虎之力終於迫到黎前面。見到有３條繩，上面仲有鈴鐺的，將條繩搖吓就會掂到個鈴鈴，亦都會聽到鈴鐺的聲音，然後就要雙手合十，放錢入去，講出你的願望。（我諗冇人會係男根祭典入面祈求自己會發達啩）。而我就選擇左中間顏色與別不同的繩黎許願，而我個願望應該都係與別不同，哈哈。





相信大家見到呢個場面都已經見怪不怪了，人頭湧湧的情況下，我再迫入去睇下佢地排緊咩啦？原來係賣緊糖，但係呢隻糖係以男性同女性生殖器宮而做成的，我仲見到有串燒三兄弟添。係人人個口都含緊男根糖的時候，我唔買黎含應該就係與民為敵。所以，係每件５００日元的情況下，我居然係買左五千日元（我地同事有福啦！）




呢度就係我的戰利品，有效期係到２０２０年的４月份，唔洗驚咁快就過期。







係咁莊重的金山神社，一邊賞櫻，一邊含住男根，幾咁賞心悅目。






參觀完神社同買完男根糖後，就要出去圍繞一周，睇下會唔會咁好彩可以撞番重頭戲抬大轎，問番入面的工作人員後，佢地話大約２點左右會再出黎巡遊一次，所以我就繼續行行企企食兩味，點知真係比我搵到野食。各位觀眾，去相！！！







快Ｄ黎睇，係朱古力香蕉啊！顏色仲要好靚。而係呢個時侯，我已經將男根糖含到變成一條秀珍茹啦。而且仲有好多其他野買，夫婦和合饅頭？？







係呢個祭典入面，有好多各式各樣的人物扮演唔同角色黎慶祝呢個一年一度的節日。佢地係想引人注目定係想為呢個祭典增加氣氛？我都唔係好清楚，我只係知道，大家都係好歡欣咁對待呢個祭典，並唔係以色情，或有色眼鏡去睇呢個祭典，如果換轉變成香港的話，我諗應該係我有生之年都唔會發生。言歸正傳，等到咁上下終於都有野睇啦，唔講咁多啦，去片。